『媽記奶品工場』漫畫

母乳是寶寶最佳的天然食糧。衞生署家庭服務一直致力全方位推廣母乳餵哺。這次我們就嘗試以漫畫的形式讓大家去感受一位授乳母親的親身體驗。

本漫畫提供者是一位熱心的授乳媽媽,她以生動有趣的圖畫,淺白易明的文字將自己的實戰情況活現眼前。若有相同經歷的媽媽,看後定必會心微笑;未有餵哺經驗者,亦明白到方法總比困難多。

當然這漫畫所描繪的是這位媽媽與她寶寶的經歷和她自己的所思所感,並不代表是每一對授乳中的母嬰的必然經歷。

在此多謝這位媽媽熱心的分享。

第1頁

餵媽媽奶並不偉大,“度叔”師奶餵奶原因曝光

媽記(草工埸)開業原因

餵媽媽奶唔係單單為BB 好

對媽媽都好好,一舉多得

第2頁

原因1: 慳錢

  • 這個奶粉廣告,日日黃金時段在電視播、在電腦, 診所,雜誌、巴士都有宣傳。
  • 仲有免費BB會、送 Sample、營養師提供資訊…
  • 奶粉商宣傳的錢何來?我不甘心做贊助!

第3頁

原因 2: 不服輸 、 好勝

  • 在母乳講座中聽到非常深刻的分享:一個單親媽媽,在職並進修中都能的餵全人奶。她散發出一種很吸引我的氣質。 我想佢得我都得!!
  • 跟媽媽說我會餵人奶(以為佢會反對) !她若無其事地回答說〝好呀, 我以前都是餵人奶的。〞
    • 上課出席率經常100%。成日想請病假便不用上學,但又沒有生病。謎底終於揭開。
  • 當年沒有討論區、 沒有母乳協會、 沒有餵奶房、 沒有餵奶巾、 沒有泵、 沒有湯水;媽媽當時只有20歲又讀書不多都可以成功餵奶, 我若餵不了便很不濟?

第4頁

原因3: 節省時間

埋身餵哺可以:一邊餵奶一邊打機、上網、陪大女兒玩、餵大女兒食飯,活動自如。當你餵得純熟了,你需要的工具只是: 臂彎一條 (不包括手掌) 。

第5頁

原因4: 懶

  • 餵媽記不用冲奶、洗樽、烚樽
  • 半夜時分餵牛記    
    1. 爬起身
    2. 取樽
    3. 倒熱水
    4. 加粉
    5. 搖匀
    6. 試溫度
    7. 抱起BB
    8. 餵奶
    9. 掃風
    10. 放低BB
    11. 洗樽
    12. 烚樽消毒
    13. 保存奶樽
  • 餵媽記
    1. 爬起身
    2. 抱起B
    3. 掀起衣服
    4. 餵奶
    5. 掃風
    6. 放低BB

第6頁

原因5: 外出不限時又輕便

  • 裝備:    
    • 媽記: 奶巾一塊,摺好放進靚靚10蚊店化粧袋,又輕又美觀。
    • 外出24小時… 48小時…旅行幾日甚至6個月裝備都一樣。
    • 牛記(只限3餐): 1壺熱水、1壺凍水、奶粉和奶樽。
  • 餵哺地點:
    • 媽記: 有巾/sling,坐定、站着、步行中都餵到 (其實邊行邊餵無人發現, 因為無人expect可以步行中餵) 不過我也只試過在私人地方邊行邊餵。
    • 牛記: 未聽過,有人能夠一路行一路沖奶/餵樽。本人喜歡外出,成日去街 ,埋身餵非常方便 ,早出晚歸冇難度。

第7頁

原因6:瘦

BB出世細2.5公斤,4個月7公斤,6個月有8.2公斤

BB活動時所消耗的能量都沒得計

以上體重來源只有一個----媽記(草工場)

結婚前絕食又做運動,都不及餵人奶之後幾個月這麼fit,還可以甚麼都食。豐富早餐,少少運動,連婚戒都鬆脫。

第8頁

原因7:減少煩惱事

  • 其一: 格價 (天生格價狂)

    好少買超過100元的東西,食奶粉要認真格價,仲會去二手網睇下有冇平放,為慳錢多幾重功夫

  • 其二: 自家工場生產 不外銷 無懼水貨客,不用周圍撲粉,搶不到的資源
  • 其三: 不用選擇 (避免選擇困難症發作)

第9頁

原因8: 成為BB 的唯一 (母親的佔有慾)

〝心情剖白〞

嫲嫲全日同BB一齊, BB見嫲嫲多些, 嫲嫲好多野代替到媽媽,雖然很感謝。坦白說還是有點酸酸, 心底希望BB可以跟自己多些。

放工後的埋身很甜蜜

第10頁

原因9: 虛榮感

我認我是世俗又無聊,貪圖虛無的虛榮感。 但真是忍唔住,有人讚我的BB(明知客套),我都會沾沾自喜,覺得有人賞識。 縱然途人根本唔欣賞(就好似我唔識欣賞名牌、唔明手袋點解咁貴)。別人未必知道我的奶有幾好, BB有幾鍾意, 總之個心都係飄飄然, 好自豪… 有用努力換取會更開心, 好似有人靠努力接多份job做,賺錢買袋;我就靠努力,一日餵好多次,特別有成功感(人地讚的時候)。

第11頁

原因10: 發揮未用過的器官的長處

乳房 ----- 生產乳汁,未曾生產都無法使用,由十幾歲開始為佢花費幾多銀両,(我承認我市儈),養兵千日,用得一陣,當然用盡佢 (無良老闆?! 不是,是不想佢懷才不遇,用幾盡都是幾年啫),就算不修邊幅如我的女人也獲得一對乳房。

* 本來有乳腺增生問題的我,因為哺乳,沒有個硬塊。希望停了之後keep住好啦。

註: 本人認為乳房的主要用途為哺乳 (如閣下認為不是的話,可以不把此優點列入考慮因素) ,其他用途(如觀賞用) 實在是副用途。

第12頁

圖片:媽記奶品

第13頁

母乳的生產: 供求關係

其實製造母乳好像工廠生產,客人下單, 工場就生產。我們可以在中間做協調, 做得好就會餵得好。因為生產母乳會用到能量和營養, 所以無必要就不會生產

第14頁

需求大, 產量就會提升

第15頁

常見誤解1 : 留貨 (唔夠用時) : 這個是間中我在討論區見到,會導致失敗的原因之一。 真係非常之可惜,明明有貨,應該散晒先,唔夠再落單,工場先生產得更多以致足夠。 當然如果夠的話唔需要夾硬清唒。

第16頁

埋身同全泵

  • 埋身係上奶最好的方法
  • 埋身就好似客人親自催促,在門口等,工場便會努力造。
  • 而泵就好似send email 落order 咁。
  • 而埋身又會去貨去清些,個身都會造多些

第17頁

埋身得密,貨去得好,工場就多生產。

泵得密都可以增奶, 不過效果無咁好,雖然係咁,order得多一樣可以夠個客用的。

如果你個客,唔可以親自追,好似我的大女咁,唔識埋身。因為之前去左兒科,咁你就要代佢追工場,要跟緊些。

第18頁

有時見到討論區,有人話唔夠貨,一問之下原來一日只send 4個order。

大佬,你個客一日用8 批貨,你send 得4 張purchase order,夠用的話你個廠算是神級啦 ,仲要投訴話自己係窮媽,工場長好無奈。

如果Mail極都不夠,你要注意下你的Mail有無問題,是否唔夠清晰,啲貨一日唔清,工場都唔想增產,有誤會佢就get 唔到客人實際需求(個泵同個身唔夾)

第19頁

工欲善其事,必先利其器 ,如有需要做泵媽 ,有好的泵會事半功倍 ,每個工場長的性格唔同,唔知咩類型的mail會同佢夾,所以都好難比意見,如果你無準備都唔洗驚,至少你仲有對手。

另外,有些埋身餵的媽媽,心血來潮想泵出嚟睇下有幾多,然後比結果嚇一大跳的case 時常發生。

請勿比那少少貨仔嚇親, 又以為個廠唔掂,上網唱衰佢,其實只係唔慣出貨模式,同埋無迫到埋身的feel。

親自追貨,客人會攞得唒存貨 ,而mail 好多時都清唔哂有貨剩的!

第20頁

其實全泵一樣夠客仔食,不過要付出比埋身多。

因為又要訂貨,又要存倉、運輸同售後服務。

而且因為無咁出奶,仲要次數多好多,所以要給個well done 印仔予各泵媽。“辛苦晒啦!”

小後記:

我第一胎都是全泵,起初一日泵 10 次,BB食 8次,老公幫手餵幾餐。當時密密泵都夠BB食,從來無諗過自己是窮媽。第二胎有唒經驗,一出世就埋身,上奶快好多,奶量多第一胎同期好多倍,先諗到第一胎原來是大家口中的‘窮’媽。但是泵出嚟少過以前。全埋身好方便,我敢講方便過餵粉。唔洗煲水洗樽、雙手又可free 打機、大家盡量埋身餵,還不易塞!!

第21頁

增奶的方法

1.最好又簡單的方法就係餵密啲,再講多次 -“密啲” 。無論埋身定泵,order得多就會夠貨。

咁都有少少Tips比大家: 半夜追魂-增產決定,如果客人瞓著,Send mail (泵)都可以的!!

第22頁

2.保持心情舒暢 (快樂辦公室)

產後情緒本來就不穩定,加上餵人奶會經常性聽到很多閒言閒語,阿B一喊實有長輩甚至平輩、後輩“challenge”你的奶量,所以要提醒自己開心啲。為了營造開心的環境,製造更多開心奶,媽記老闆宜學技能:左耳右耳出入大法。奶粉商每日花多少錢賣廣告,身邊人被洗腦多年,要改變別人很難,惟有提昇自己EQ。“哦” 咗就算啦。

第23頁

你想你的奶品在愉快環境下出產嗎?又或是你喜歡情緒化的Boss嗎?Be Happy

第24頁

3.充足的休息

由於產奶係用身體的能量,充足的休息有好大幫助的,安排休息時間Tips :

  1. 外判(家務儘量外判)
  2. 與客人同步休息(BB瞓你就瞓 不管是上午還是晚上)
  3. 儘量埋身,省略泵奶的額外功夫

第25-26頁

4.美食當Bonus

好多人以為食某些神奇食物就會突然多奶,某些受詛咒食物會即收奶,就狂食"神奇"食物,卻發現仍未夠BB食。其實食物只是Bonus ,個point 一直都係有order 先會生產,就算你出多一個月Bonus 比員工,客人唔要貨,倉有貨剩 工場都唔會生產的,所以記住個基本原則,唔洗因為食左某些野就惶恐,order多些就OK ,如果order 夠次數仲唔夠奶,又或者想儲冰奶,可以出啲 Bonus 比員工。

員工開心,自然努力工作,但記住同一樣的食物,有人愛吃亦有人討厭。坊間媽記都話,某些食物對多數媽記分店也有幫助,比如是木瓜、魚湯、豆漿… 員工有此獎勵會更落力,而唔受歡迎食物大約是內臟、韮菜、麥芽、乳鴿等,不過不慎吃了都不怕,如果發現生產率下降,之後避免再食就可以了,無必要過份自責,或者責怪提供食物的人。

其實上奶食物並非必需品,本人也沒有吃魚,沒有飲牛奶、魚湯。一樣夠 BB 食的。又因為BB無敏感,沒有戒口,又因要在Lunch time 爭取時間泵奶,每天以別人口中說會收奶的麥精/華田沖麥皮飲充飢,亦曾經一至兩星期不曾吃米飯 (只吃麵、包類食物)證明只要肯餵就會夠BB食,世界很大,貧窮地方的媽媽也夠奶,素食者也夠,不用太擔心唔夠奶!不過若然你知道員工口味,發些花紅給他們也是好事呢!

第27頁

5. 非常情況,可能要用非常手段來增加奶量

例: 

  • 有需要儲奶或成日掛住瞓嘅BB增產決定!!
  • 雙管齊下 一邊餵一邊泵 交收中
  • “空”泵(食完泵)
  • Meet 到Quota 就好收手,唔好係唔係都要員工加班

第28頁

注意

其實夠奶的話無需要特別增奶,不然可能會奶過多而導致以下情況:

  • 塞左
  • 濁親,客人搬唔切?
  • 前奶過多(後奶BB收不足)

 

第29頁

圖片:媽記奶品

第30頁

埋身埋得多
唔洗捱腥飲魚湯
補左奶粉又唔泵
奶量減少盞揼心

第31頁

開頭個個滴滴仔
少到鋪唔滿樽底
唔好以為係窮鬼
正確姿勢埋身餵
阿B好快變肥仔
總之有時間就抖
話知啲野發晒臭
休息夠多奶就夠
夠奶阿B就好湊
好湊更多時間抖

第32頁

泵一泵
慳返好幾蚊
唔掂就好快D
搵人幫手啦

如有任何母乳餵哺的問題,可向以下機構求協助:

  • 衞生署家庭健康服務
  • 親臨附近的母嬰健康院
  • 致電母乳餵哺熱線:3618 7450
  • 愛嬰醫院香港協會:2838 7727(上午9時至下午9時)
  • 香港母乳育嬰協會:2540 3282(24小時電話錄音)
  • 你的兒科/產科/家庭醫生

若需要查有關母乳餵哺的資料,可登入:

(07/2014 修訂內容)