(सामग्री संशोधित 04/2023)

सर्भिकल परीक्षण जाँचले ASCUS को उपस्थिति देखाउँदा, यसको अर्थ माइक्रोस्कोपमा हेर्दा कोशिकाहरू सामान्य कोशिकाहरूभन्दा केही फरक छन् तर तिनीहरू बिग्रिएको डिग्री हेर्दा तिनीहरूलाई पूर्व क्यान्सर कोशिकाहरू भन्नका लागि पर्याप्त गम्भीर छैनन् भन्ने हो। ASCUS सर्भिकल परीक्षण जाँचमा फेला पर्ने सबैभन्दा साझा असामान्य नतिजा हो: परीक्षण जाँच गर्ने प्रत्येक 100 महिलाहरूमध्ये लगभग 3 देखि 5 जनामा माथि उल्लेखित लक्षण देखिने छ र जसमध्ये 50% कोशिकाहरू 4 देखि 6 महिनापछि सामान्य अवस्थामा फर्किने छन्। HPV ट्रायज भनेको एउटा अतिरिक्त जाँच हो जुन पाठेघरका कोषहरू उच्च जोखिमको ह्युमन पेपिलोमाभाइरस (HPV) द्वारा सङ्क्रमित छ वा छैन भनी मूल्याङ्कन गर्न गरिएको छ।  यसले समय बित्दै जाँदा कोषहरू पूर्व क्यान्सर कोष वा क्यान्सर कोषहरूमा परिवर्तन हुने जोखिमलाई मूल्याङ्कन गर्छ किनकी पाठेघरको क्यान्सरका लगभग सबै मामिला उच्च जोखिमको HPV को निरन्तर सङ्क्रमणबाट हुन्छ।

पाठेघरका कोषहरू उच्च जोखिमका HPV बाट सङ्क्रमित भएका छैनन् भने कोष गम्भीर रूपमा ह्रास हुने सम्भावना धेरै न्यून हुन्छ।  तसर्थ, महिलाहरूले सर्भिकल स्मियर पछि 3 वर्षमा मात्र दोहोर्‍याउन आवश्यक हुने छ।   दोहोर्‍याएर गरेको स्मियरको नतिजा सामान्य छ भने, उहाँले अन्य महिलाहरूले जस्तै नियमित परीक्षण जारी राख्न सक्नुहुन्छ। दोहोर्‍याएर गरेको जाँचको नतिजामा निरन्तर असामान्य कोषहरू देखिन्छ वा कोषहरूको स्थिति अझै बिग्रन्छ भने, उहाँलाई कोल्पोस्कोपीका लागि विशेषज्ञ क्लिनिकमा पठाइने छ।

हामी तपाईंले दोहोर्‍याएर जाँच छिटोभन्दा छिटो गर्न चाहनुहुन्छ भनी बुझ्दछौँ। अघिल्लो स्मियरको अवधिमा सर्भिकल कोषहरूको बाहिरी तह काटिएको र कोषहरूलाई फेरि बढ्न समय लागेको (कम्तीमा पनि 4 देखि 6 हप्ता) हुनाले, प्रारम्भिक पुनः परीक्षणले सर्भिकल कोषहरूको अवस्था सही देखाउन सक्दैन र कोषहरूलाई सामान्य अवस्थामा फर्कन पर्याप्त समय हुने छैन। यसका साथै, धेरै छिटो गरिने जाँचले कहिल्यै क्यान्सर नहुने परिवर्तनहरू पत्ता लगाउन सक्छ र यसले अनावश्यक चिन्ता, छानबिन र उपचार निम्त्याउँछ। तसर्थ, तपाईंले निर्धारित समयमा दोहोर्‍याएर गर्ने जाँचमा उपस्थित हुन सुझाव दिइन्छ।

पाठेघरका असामान्य कोषहरू उच्च जोखिमको HPV बाट सङ्क्रमित भएका छन् भने यी कोषहरू गम्भीर रूपमा बिग्रँदै गएका वा क्यान्सरमा विकसित हुने सम्भावना छ। तसर्थ, महिलाहरूलाई कोल्पोस्कोपीका लागि विशेषज्ञ क्लिनिकमा पठाइने  छ। गम्भीर रूपका खराब पाठेघरका कोषहरू क्यान्सरमा विकसित हुन 5 देखि 10 वर्ष लाग्ने हुनाले, यो स्वास्थ्य अवस्थाले तत्कालै हानि पुरयाउँदैन त्यसैले धेरै चिन्ता नलिनुहोस्।

कोल्पोस्कोपी भनेको के हो?

कोल्पोस्कोपी भनेको म्याग्निफाइङ ग्लासको प्रयोग गरेर गरिने योनि र पाठेघरको मुखको जाँच हो। यो परीक्षण प्रक्रिया एनेस्थेसियाको प्रयोग नगरिकन क्लिनिकहरूमा गर्न सकिन्छ र यसका लागि लगभग 10 मिनेट लाग्ने छ।

प्रक्रियाहरू

चिकित्सकले कोल्पोस्कोप घुसाउनु हुने छ, योनि र पाठेघरको मुखमा विशेष प्रकारको चिकित्सकीय सोलुसन लगाउनु हुने छ र त्यसपछि कुनै असामान्य घाउको पहिचान गर्न म्याग्निफाइङ ग्लासको प्रयोग गर्नुहुन्छ।  असामान्य घाउ भएको फेला पारिएमा, चिकित्सकले उक्त तन्तुको सानो भाग निकाल्नका लागि उपकरणको प्रयोग गर्नु हुने छ र थप विश्लेषणका लागि यसलाई प्रयोगशालामा पठाउनु हुने छ।