Sa unang ilang taon ng buhay ng isang sanggol, lumalaki at umuunlad ang utak sa kahanga-hangang bilis. Mabilis na sumusulong ang sanggol mula sa ganap na umaasang sanggol patungo sa isang nagsasariling bata na kaya ang mga karaniwang paraan ng pag-iisip, pag-angkop at paglutas ng problema. Habang mahalaga ang henetiko sa pagtukoy ng mga abilidad at kakayahan, mahalaga rin ang tungkulin ng kapaligiran sa pag-apekto sa pag-unlad ng pagkatuto sa pakikisalamuha at emosyon ng inyong anak.

Ang pag-unlad ay isang nagpapatuloy na proseso. Dumadaan ang bata sa bawat yugto sa isang itinakdang pagkakasunud-sunod. Gayunman, bawat bata ay NATATANGI. Uunlad ang inyong sanggol sa kanyang sariling bilis. Habang tila nagpapakita ang mga bata ng ilang katangian, pag-uugali at nagagawa ang mahahalagang pangyayari sa mga partikular na edad, maaaring maging normal ang malawak na hanay ng pagsulong ng pag-unlad. Kaya mahirap maging eksakto tungkol sa kung ano ang dapat asahan sa bawat yugto ng pag-unlad ng isang partikular na bata.

Ano-ano ang iba't ibang larangan ng pag-unlad

• Pagkilos
• Pag-unawa
• Wika
• Emosyon at pag-uugali
• Mga Pandamdam gaya ng Paningin at Pandinig
• Pakikipag-usap sa kapwa

Mahalaga at magkakaugnay ang lahat ng larangan

Ano ang kailangan ng inyong anak

Kailangan ng mga bata ng ilang elemento upang lumaki at umunlad sa kanilang ganap na kakayahan lalo na sa maaagang yugto ng buhay. Kailangan niya:

• na maramdamang espesyal, minamahal, at pinahahalagahan.
• na maramdamang ligtas.
• na maramdamang nagtitiwala.
• ng patnubay.
• ng balanseng karanasan ng kalayaan at mga limitasyon.
• ng pagkalantad sa isang magkakaibang kapaligiran na puno ng iba't ibang nagpapasigla.

Paano kayo makatutulong

Sa pamamagitan ng pagbibigay ng isang angkop na kapaligiran para sa inyong anak, maaari kayong gumawa ng kaibahan sa pag-unlad ng inyong anak.

• Magbigay ng isang kawili-wili at ligtas na pisikal na kapaligiran, ayon sa edad at angkop sa pag-unlad na mga gamit sa paglalaro, upang tumuklas at matuto ang inyong anak.
• Tumugon nang masigla at agad sa pag-uugali ng inyong anak: pagngiti kapag ngumingiti ang inyong anak, pakikinig at pagtugon sa mga tanong ng inyong anak gaano man kaikli.
• Makipag-usap sa inyong anak nang madalas, gumagamit ng masigla, mayaman sa paglalarawan, at tumpak na wika, hikayatin siyang ipahayag ang kanyang sarili.
• Iwasang magtakda ng napakaraming paghihigpit, parusa o kontrol. Sa halip, bigyan ang inyong anak ng puwang upang tumuklas at maging ng pagkakataon upang gumawa ng mga pagkakamali na nasa ilalim ng mga ligtas na restriksyong ipinasusunod.
• Magkaroon ng mga makatuwirang inaasahan para sa mga kakayahan ng inyong anak.

Nagsisilbi ang sumusunod na mga serye ng "Pag-unlad ng Bata" upang ipakita ang pangkalahatang pagsulong sa mga yugto ng pag-unlad. Natatangi ang bawat bata. Normal lang sa isang bata na makamit ang ilang tagumpay nang mas maaga at ang iba ay mas huli kaysa sa karaniwang kalakaran.

Huwag maalarma kung medyo iba ang tiyempo ng inyong sanggol o nabibigong makamit ang ilang kakayahan sa ilang yugto. Maaari lang nitong inihuhudyat ang pangangailangan para sa mas maraming atensyon.

Kung mayroon kayong anumang alalahanin kaugnay ng pag-unlad ng inyong anak, talakayin ito sa mga nars at doktor sa alinmang MCHC o sa inyong doktor ng pamilya/ pediatrician.

Mayroon kaming isang serye ng mga workshop at polyeto ng "Masayang Pagiging Magulang!" para sa mga magiging magulang, mga magulang ng mga sanggol at mga batang hindi pa nag-aaral. Mangyaring makipag-ugnayan sa aming tauhan ng pangangalagang pangkalusugan para sa impormasyon.