Ano ang kailangan nating manmanan sa pag-unlad ng mga bata?

Dumadaan sa mabilis na mga pagbabago sa paglaki at pag-unlad ang mga bata sa unang ilang taon ng kanilang buhay. Para sa karamihang bata isa itong proseso na walang anumang nangyari. Gayunman, para sa ilan, maaaring lumitaw ang problema. Sa pagmamanman sa paglaki at pag-unlad ng mga bata nang regular, layunin nating tukuyin nang napapanahon ang anumang problema sa paglaki, pag-unlad o pag-uugali, upang masimulan ang angkop na pamamahala.

Ano ang "Pamamaraan ng Pagmamatyag sa Pag-unlad"?

Inilunsad ng Family Health Service ang Pamamaraan ng Pagmamatyag sa Pag-unlad (DSS) sa lahat ng MCHC mula 2007. Isang nagpapatuloy na proseso ang pagmamatyag sa pag-unlad. Binibigyang-diin ng Pamamaraan ng Pagmamatyag sa Pag-unlad (DSS) ang pakikipagtulungan sa mga magulang, guro at iba pang tagapag-alaga at layuning tulungan ang mga magulang at iba pang tagapag-alaga na maging may kakayahan at epektibo sa pagtataguyod at pagmamasid sa pag-unlad ng mga bata. Ibinibigay sa mga magulang at iba pang tagapag-alaga ang impormasyon tungkol sa pag-unlad ng bata at pagiging magulang sa pamamagitan ng pakikipagtalakayan sa mga propesyonal, mga polyeto, video at mga mapagkukunan na nakabase sa web pati na rin mga workshop at pag-uusap tungkol sa pampublikong kalusugan. Maaari ding sumali ang mga magulang sa Parent-Child e-Link upang tumanggap ng elektronikong impormasyon na may kaugnayan sa edad ng kanilang mga anak.

Paano isinasagawa ang Pamamaraan ng Pagmamatyag sa Pag-unlad (DSS)?

Para sa kaginhawahan ng mga magulang, itatakda ang mga panayam ng pagmamatyag kasama ng iba pang mahahalagang serbisyo gaya ng pagbabakuna. Isasaayos ang mga pagbisita sa ibang edad kung kailangan ng inyong anak ng malapitang pagmamanman.

Sa panahon ng mga panayam, magtatanong sa inyo ang aming mga nurse upang maintindihan ang inyong mga pananaw sa pag-unlad at pag-uugali ng bata sa bahay (o sa paaralan, kung naaangkop), tukuyin ang inyong mga alalahanin at gumawa ng kinakailangang obserbasyon sa bata. Sinasaklaw nito ang iba't ibang larangan ng pag-unlad gaya ng kabuuan at pinong paggalaw, wika at komunikasyon, pag-uugali at paglalaro sa lipunan, pangangalaga sa sarili, paningin at pandinig pati na rin mga pangkalahatang alalahanin. Lubos kaming umaasa sa inyong impormasyon upang makagawa ng makatwirang konklusyon tungkol sa pag-unlad ng inyong anak.

Paano makakasali ang aking anak sa Pamamaraan ng Pagmamatyag sa Pag-unlad (DSS)?

Awtomatikong masasaklaw ng DSS ang lahat ng batang nakarehistro sa mga MCHC.

Makatatanggap ba ako ng anumang feedback sa progreso ng aking anak?

Sa pagtatapos ng panayam, ipaliliwanag ng nurse sa inyo ang tungkol sa progreso ng inyong anak sa iba't ibang larangan ng pag-unlad, magbibigay ng kinakailangang patnubay tungkol sa kanyang pag-unlad sa hinaharap at tutugunan ang anumang alalahanin na maaaring mayroon kayo. Kung ituturing ng nurse na maikukumpara ang pag-unlad ng inyong anak sa mga batang kaedad niya, bibigyan niya kayo ng appointment para sa susunod na rutinang pagbisita at lahat ng kailangan ninyong gawin ay ituloy ang inyong sariling obserbasyon. Kung mayroon kayong anumang tanong o ikinababahala bago ang susunod na nakaiskedyul na pagbisita, mangyaring huwag mag-atubiling gumawa ng appointment upang talakayin sa aming mga nurse.

Ano ang mangyayari kung may problema?

Kung hindi gumanap ang inyong anak ayon sa inaasahan sa ilang larangan ng pag-unlad o naghihinala ang nurse na may problema alinman mula sa inyong ulat o sa kanyang sariling obserbasyon, magbibigay siya sa inyo ng appointment para sa follow up na pagbisita, o magsasaayos ng konsultasyon sa doktor para sa mas detalyadong pagsusuri ng pag-unlad. Isasaayos ang referral sa espesyalista kung kinakailangan.

Paano ako makatutulong na itaguyod at manmanan ang pag-unlad ng aking anak?

Bilang mga magulang o tagapag-alaga, mayroon kayong palagiang access at interaksyon sa inyong anak. Labis kaming umaasa sa inyong pakikipagtulungan. Mayroon kaming serye ng mga polyeto, usapang pangkalusugan, 24-na oras ng naka-rekord na Parenting Hotline pati na rin mga mapagkukunan na nakabase sa web tungkol sa pag-unlad ng bata, pagiging magulang at iba pang kaugnay nito. Nagbibigay ito sa inyo ng kapaki-pakinabang na impormasyon upang mas maintindihan ang pag-unlad ng inyong anak at mga pangangailangan sa pagiging magulang. Kung nababahala kayo tungkol sa inyong anak sa anumang yugto, mangyaring ipaalam sa amin. Seryoso naming tatanggapin ang inyong mga alalahanin.

Kung mayroon kayong anumang alalahanin o tanong, mangyaring talakayin sa mga nurse at doktor sa alinmang MCHC.