(Binago ang nilalaman 02/2013)

Maaaring masuri ng pagsusuri na pag-screen bago manganak ang inyong panganib (o tsansa) ng pagkakaroon ng sanggol na may malubhang kondisyon sa pagsilang at binibigyang-daan ang maagang pamamahala. Bilang karagdagan, nag-aalok ang Hospital Authority ng pag-screen bago manganak para sa Down Syndrome ayon sa yugto ng pagbubuntis.

Ano ang diagnosis bago manganak?

Nilalayon ng diagnosis bago manganak tuklasin at isaayos ang angkop na pamamahala ng malulubhang sakit ng sanggol sa sinapupunan.
Maaaring kabilang sa mga pagpipilian sa pamamahala ang:

• Direktang paggamot sa sanggol sa loob ng sinapupunan
• Mga paghahanda para sa pinakamainam na pamamahala matapos isilang
• Pagtatapos ng pagbubuntis

Kasama sa diagnosis bago manganak ang pagsusuri sa mga buntis na may mataas na panganib ng pagkakaroon ng mga sanggol na may mga pangunahing abnormalidad sa pagsilang o mga kondisyong namamana. Kabilang dito ang:

• Mga kababaihang nagsilang ng mga abnormal na sanggol na may sakit sa puso nang isilang, mga depekto sa gulugod, o iba pang pinsala sa pagsilang.
• Mga kababaihang may kasaysayan ang pamilya ng mga sakit na henetiko, tulad ng hemophilia.
• Mga mag-asawang parehong tagapagdala ng thalassemia.
• Mga kababaihan na itinuturing na nasa panganib batay sa pagsusuri sa klinika ng kanilang mga obstetrician.

May mga limitasyon ang mga pagsusuring diagnostic bago manganak at hindi maaaring matuklasan lahat ng abnormalidad at mga sakit sa pamamagitan ng kasalukuyang teknolohiya sa medisina.

Ano ang alam ninyo tungkol sa diagnosis bago manganak?

May kaugnayan ang paraang ginamit sa uri ng mga abnormalidad na isinaalang-alang. May dalawang pangunahing uri ng mga pagsusuri: (A) mga pagsusuring gumagamit ng paghiwa ng balat o pagpasok ng instrumento sa katawan upang kumuha ng mga selula ng sanggol sa sinapupunan o mga selula na may kaugnayan sa sanggol para sa chromosomal at iba pang pagsusuri at (B) imaging o paggamit ng larawan upang matuklasan ang mga abnormalidad ng istruktura.

(A) Mga pagsusuring gumagamit ng paghiwa ng balat o pagpasok ng instrumento sa katawan

Para sa mga abnormalidad ng chromosome, isinasagawa ang direktang culture ng mga sampol ng selula mula sa sanggol sa sinapupunan sa pamamagitan ng isa sa mga sumusunod na paraan sa iba’t ibang yugto ng pagbubuntis: chorionic villus sampling, amniocentesis o cordocentesis.

Chorionic villus sampling –
Isinasagawa ito sa pagitan ng 10 hanggang ika-13 linggo ng pagbubuntis. Kumukuha ng sampol ng tisyu ng inunan at karaniwang magkakaroon ng resulta ng pagsusuri ng chromosome sa 2-3 linggo.

Amniocentesis –
Karaniwan itong isinasagawa sa pagitan ng 16 hanggang 20 linggo ng pagbubuntis. Kinukuha ang sampol ng likido na pumapalibot sa sanggol sa sinapupunan. Karaniwang magkakaroon ng resulta ng pagsusuri ng chromosome sa loob ng 3 linggo.

Cordocentesis –
Karaniwan itong isinasagawa pagkatapos ng 20 linggo ng pagbubuntis. Kinukuha ang sampol ng dugo ng sanggol sa sinapupunan mula sa pusod. Karaniwang magkakaroon ng resulta ng pagsusuri ng chromosome sa loob ng 5-7 araw. Magagamit ang pagsusuri kung ninanais ang agarang resulta.

Paano isinasagawa ang mga pagsusuring ito?

Isinagawa ang lahat ng pamamaraang ito sa ilalim ng patnubay ng ultrasound. Ginagamit ang isang mahabang karayom upang kumuha ng sampol ng tisyu sa loob ng matris, na kinu-culture pagkatapos sa laboratoryo. Pagkatapos, maaaring ma-diagnose o ibukod ang mga abnormalidad sa chromosome at ilang henetiko o mga namamanang kondisyon tulad ng thalassemia major.

Maaasahan ba ang resulta?

Mataas ang katumpakan ng pagsusuri ng chromosome na ginagamitan ng mga paraang nabanggit sa itaas. Gayunman, kailangan ang ekspertong interpretasyon ng espesyalista dahil normal na mga pagkaiba-iba lang ang ilang abnormalidad ng chromosome at hindi magreresulta sa kakulangan sa pisikal o mental na paglaki ng sanggol sa sinapupunan.

Magdudulot ba ng mga panganib ang mga pagsusuring ito sa sanggol sa sinapupunan?

Iniuugnay ang ilang pagsusuring gumagamit ng paghiwa ng balat o pagpasok ng instrumento sa katawan sa isang tiyak ngunit maliit na panganib ng pagkalaglag na halos 0.5% hanggang 1.5% sa ilalim ng pangangalaga ng mga ekspertong doktor, ibig sabihin 1-3 mula sa 200 kababaihan na tumatanggap ng pagsusuring gumagamit ng paghiwa ng balat o pagpasok ng instrumento sa katawan ay magreresulta sa pagkalaglag.

Kung normal ang resulta, ibig sabihin ba nito ay normal din ang sanggol sa sinapupunan?

• Hindi maaaring matuklasan lahat ng henetiko o mga namamanang sakit ng mga paraang ito dahil sa mga limitasyon sa teknolohiya sa medisina.
• Hindi matutuklasan ang mga depekto sa istruktura o mga depekto sa paggana na walang kaugnayan sa mga abnormalidad sa chromosome.

(B) Eksaminasyon gamit ang ultrasound

• Ang eksaminasyon gamit ang ultrasound ang pinakakapaki-pakinabang na pagsusuri para sa pagtuklas ng pangunahing mga abnormalidad sa istruktura ng sanggol sa sinapupunan.
• Halos 30-70% ang antas ng pagtuklas para sa pangunahing mga abnormalidad ng istruktura sa pamamagitan ng eksaminasyon gamit ang ultrasound na isinagawa sa pagitan ng 18 hanggang 22 linggo ng pagbubuntis.
• Nakaaapekto sa antas ng pagtuklas ang iba't ibang abnormalidad o kaugnay na mga sistema ng organ, ang karanasan ng doktor na nagsasagawa ng ultrasound pati na rin ang resolusyon ng makina ng ultrasound.
• Kung nagpapahiwatig ng mga karamdaman sa chromosome ang natuklasang mga abnormalidad sa eksaminasyon gamit ang ultrasound, maaaring ipahiwatig ang karagdagang pagsusuri na gumagamit ng paghiwa ng balat o pagpasok ng instrumento sa katawan na nabanggit sa itaas.

Kung normal ang eksaminasyon gamit ang ultrasound, nangangahulugan ba ito na normal din ang sanggol sa sinapupunan?

• Habang ipinahihiwatig ng normal na eksaminasyon gamit ang ultrasound na ang mga tsansa ng pangunahing mga depekto sa istruktura sa sanggol sa sinapupunan ay dapat maliit, hindi nito ibinubukod ang lahat ng posibilidad ng mga naturang depekto.
• Maaaring hindi kaagad matuklasan ang ilang abnormalidad ng chromosome sa pamamagitan ng ultrasound, kaya hindi ibinubukod ang mga sakit na ito ng normal na eksaminasyon gamit ang ultrasound.

Paano at saan kukuhanin ang mga pagsusuring diagnostic na ito bago manganak?

Hinihikayat ang lahat ng buntis na talakayin sa kanilang mga doktor kung mayroon silang tunay na pag-aalala na maaaring maging abnormal ang kanilang sanggol sa sinapupunan.

Magagamit ang diagnosis bago manganak at serbisyo sa pagpapayo sa lahat ng pangunahing yunit ng obstetric sa ilalim ng Hospital Authority. Dapat lumapit ang mga mag-asawang humihiling ng diagnosis bago manganak at mga serbisyong pagpapayo sa mga ospital ng Hospital Authority na may mga serbisyong obstetric sa kanilang mga distrito, o maaari silang isangguni sa isa sa mga klinikang ito sa pamamagitan ng kanilang sariling mga doktor, mga Maternal and Child Health Centre, o iba pang pribadong klinika.

(Inihanda ang polyetong ito ng Kagawaran ng Kalusugan at ng Hospital Authority)