Resulta	Aabisuhan ka sa pamamagitan ng
Negatibo o Normal	Makatatanggap ka ng isang abiso sa pamamagitan ng koreo, email o SMS ayon sa mas gusto mong paraan ng pakikipagtalastasan, mula sa Cervical Screening Information System (sa loob ng 3 buwan)
Negatibo o Normal AT ipinapakita ng sampol ang pagkakaroon ng Candida o Bacterial Vaginosis	Makakakita ka ng isang sulat ng abiso at polyeto ng kaugnay na impormasyon mula sa MCHC tungkol sa Candida o Bacterial Vaginosis sa loob ng 1 buwan. (Mangyaring tandaan na hindi ka aabisuhan ng MCHC sa pamamagitan ng telepono)
Positibo o Hindi Normal	Aabisuhan ka ng tauhan ng MCHC sa telepono sa loob ng 2 hanggang 3 linggo. Isasaayos ang follow-up na appointment kung kinakailangan. Maniningil ng bayad sa bawat pagdalo.

Tandaan: Makatatanggap ka ng isang abiso sa loob ng 3 buwan sa pamamagitan ng koreo, email o SMS ayon sa iyong mas gustong paraan ng pakikipagtalastasan mula sa Cervical Screening Information System (www.csis.gov.hk) para abisuhan ka na mag-login gamit ang iyong naka-pre-set na pangalan at password sa pag-login para makita ang nakaimbak na mga resulta at sulat.

Pagrereserba ng iyong susunod na pag-screen ng cervix

• Kung normal ang iyong resulta, mangyaring magpareserba ng iyong susunod na appointment para sa pag-screen ng cervix gamit ang hotline na 3166 6631 isang buwan bago ang inirekomendang takdang petsa.
• Kinakailangan ng mga babaeng may edad na 45 o mas matanda na gumawa ng appointment pagkatapos ng ika-12 araw ng regla.
• Iwasan ang paggamit ng pessary sa puwerta, pakikipagtalik o pagdutsa ng puwerta dalawang araw bago ang pagsusuri.
• Kung inabisuhan ka sa telepono na bumalik para sa karagdagang follow-up, isasaayos namin ang isang appointment para sa iyo.

* Ibinibigay lang ng MCHCs ang pag-screen ng cervix ngunit hindi ang rutinang eksaminasyon ng puwerta.

* Mangyaring humingi ng payo mula sa pangkalahatang klinika na pang-outpatient o mga pribadong doktor kung mayroon kang hindi normal na pagdurugo ng puwerta, tumatagas na likido o iba pang alalahaning kaugnay ng sakit ng kababaihan.

Mangyaring sumangguni sa buklet na "Programa ng Pag-screen ng Cervix (Cervical Screening Programme)" o mag-browse sa www.cervicalscreening.gov.hk  para sa higit pang impormasyon.

Cervical Screening Information System – Mga Dapat Tandaan sa Pagrerehisto

Mga Dapat Tandaan ng Aplikante

1. Ang Cervical Screening Information System (CSIS) ay isang naka-computer na talaan para sa pagpapanatili at pagproseso ng datos na may kaugnayan sa pag-screen ng cervix, kasama ang personal na impormasyon ng mga kasali, mga resulta ng pag-screen at susunod na petsa ng inirerekomendang pag-screen.
2. Kuwalipikasyon: maaaring magparehistro sa CSIS ang mga babaeng nakatanggap ng pag-screen ng cervix.
3. Walang bayad ang pagpaparehistro.
4. Kokolektahin ang singil ng iyong provider ng serbisyo para sa pagsasagawa ng pag-screen ng cervix.
5. Pagkatapos sumali sa CSIS, kung ipinasa ng iyong provider ng serbisyo ang iyong mga resulta ng pag-screen sa CSIS, maaari mong:
   • repasuhin ang ipinasang mga rekord ng pag-screen sa CSIS (www.csis.gov.hk )
   • matanggap ang mga paalala para sa muling pag-screen ng cervix sa e-mail, sa SMS o sa koreo
   • pahintulutan ang mga napiling provider ng serbisyo na repasuhin ang mga rekord ng pag-screen ng kasali para sa mas mahusay at nagpapatuloy na pangangalaga
6. Mangyaring tandaan na kailangan mong isaayos mismo ang pag-screen ng cervix sa iyong mga provider ng serbisyo.
7. Kung hindi ibinigay ang address sa Hong Kong, hindi namin maipadadala ang mga sulat sa iyo sa koreo (kasama ang Sulat sa Pagbubukas ng Account, Sulat ng Paalala, Sulat ng Pagbawi ng Password, atbp.). Maaaring tawagan ka namin para isaayos ang pagkuha mo mismo ng Sulat sa Pagbubukas ng Account o Sulat sa Pagbawi ng Password sa tanggapan ng Programa ng Pag-screen ng Cervix. Gayunpaman, kung hindi mo maibibigay ang numero ng telepono para sa pakikipag-ugnayan sa Hong Kong, hindi ka namin matatawagan.

Mga Tuntunin at Kondisyon

1. Dapat mong ipaalam sa amin ang anumang pagbabago ng personal na impormasyon gamit ang Form sa Pag-update ng Impormasyon.
2. Dapat mong dalhin ang iyong Kodigo ng Awtorisasyon (na ipidadala sa iyo sa ibang pagkakataon) kapag bumisita ka sa iyong provider ng serbisyo para sa pag-screen ng cervix o mga kaugnay na pagsusuri. Maaari nitong tulungan ang iyong provider ng serbisyo para makita ang iyong nakaraang mga resulta ng pagsusuri.
3. Hindi nilalayon ng Cervical Screening Information System (CSIS) na magsilbi bilang isang kapalit ng propesyonal na medikal na payo o palitan ang anumang kaugnayan sa iyong doktor. Para sa anumang medikal na alalahanin, kasama ang mga plano ng follow-up at paggamot, dapat palagi mong konsultahin ang iyong mga provider ng serbisyong pangkalusugan. Hindi mananagot ang Kagawaran ng Kalusugan (Department of Health) para sa anumang pinsala o panganib bilang kinahinatnan ng anumang maling paggamit ng CSIS, o anumang pagkakamali o pagkawala sa iyong mga rekord.

Pahayag ng Pagkalap ng Personal na Impormasyon

Pananatilihin naming kumpidensyal sa lahat ng oras ang iyong personal na datos. Ang aming mga patakaran at gawi na may kaugnayan sa pagkalap, paggamit, pagpapanatili, pagsisiwalat, paglipat, seguridad at pag-akses ng personal na datos ay naaayon sa Ordinansa ng Personal na Datos (Pagkapribado) (Cap. 486) at nakatakda sa Pahayag na ito.

Sa pagpirma sa iyong pagsang-ayon dito sa Pahayag sa Form ng Pagrerehistro, pinahihintulutan mo ang anumang mga Serbisyo sa loob ng Kagawaran ng Kalusugan (Department of Health, DH), ang Awtoridad ng Ospital (Hospital Authority) at ang mga pampublikong ospital sa ilalim ng pamamahala nito, alinmang entidad (kasama ang mga kaanib) na pag-aari/kinokontrol ng Awtoridad ng Ospital (Hospital Authority), mga pribadong ospital at klinika, at anumang ikatlong partido kung naaangkop na ibigay ang iyong personal na datos (kasama ang impormasyon ng kalusugan) sa Cervical Screening Information System (CSIS) ng DH. Gagamitin ang naturang personal na datos para sa mga layuning nakasaad sa ibaba.

Layunin ng Pagkalap

Gagamitin ang iyong personal na datos at impormasyon sa kalusugan na ibinigay sa CSIS na pinananatili ng DH sa sumusunod na mga layunin:

1. Pagrekord at paglipat ng iyong personal na datos at impormasyon ng kalusugan (kinalap anumang oras mula sa iyong pagrerehistro sa CSIS hanggang sa iyong pag-urong) para sa pagpapatuloy ng pangangalaga o sanggunian ng iba pang medikal na propesyonal na nagbibigay ng pangangalaga sa iyo (kung umurong ka mula sa CSIS, pananatilihin lang ang iyong rekord para sa panloob na paggamit at pag-akses ng DH);
2. Pakikipag-ugnayan sa iyo at pagpapadala ng mga paalala ng pag-screen at mga abiso sa iyo;
3. Paghahanda ng istadistika para sa mga layunin ng pananaliksik o pagtuturo;
4. Para sa pagtiyak ng kalidad ng CSIS; at
5. Pagsisiyasat at pag-follow-up ng mga bagay na may kaugnayan sa CSIS.

Kusang-loob ang pagbibigay ng personal na datos. Kung hindi ka magbigay ng sapat na impormasyon, maaaring hindi namin mapatunayan na nagrehistro ka sa CSIS at hindi maibibigay/maikokoordina ang mga serbisyo para sa iyo.

Mga Klase ng Paglilipat ng Personal na Datos

Bukod sa panloob na paggamit sa loob ng DH, maaari ding iakses ng, isiwalat at ilipat ang iyong personal na datos at impormasyon ng kalusugan sa iba pang provider ng pangangalagang pangkalusugan, kasama ang mga doktor at mga laboratoryo ng pathology, mga sangay/kagawaran ng Gobyerno, ang Awtoridad ng Ospital (Hospital Authority), at anumang nauugnay na mga ikatlong partido para sa mga layunin nabanggit sa itaas, kung kinakailangan. Bukod dito, maaari lamang isiwalat ang datos sa mga partido kung kanino ka nagbigay ng pahintulot sa naturang pagsisiwalat o kung kanino pinapayagan ang naturang pagsisiwalat sa ilalim ng Ordinansa ng Personal na Datos (Pagkapribado).

Pag-akses sa Personal na Datos

May karapatan kang maakses at maiwasto ang personal na datos tulad ng nakasaad sa mga seksyon 18 at 22 at Prinsipyo 6 ng Iskeyul 1 ng Ordinansa ng Personal na Datos (Pagkapribado). Kasama sa iyong karapatang makaakses ang karapatang kumuha ng kopya ng iyong personal na datos.  Maaaring ipataw ang bayad sa pagsunod sa isang kahilingang makaakses sa datos.

Mga Katanungan

Dapat i-address ang nakasulat na mga katanungan tungkol sa ibinigay na personal na datos, kasama ang pag-akses at pagwawasto, sa Cervical Screening Programme Office, Department of Health, Room 10, 5/F, 134 Queen's Road West, Sai Ying Pun, Hong Kong. Maaari ka ring bumisita sa aming website: www.cervicalscreening.gov.hk.