(Binago ang nilalaman 06/2013)

1. Kaugnay na Impormasyon

• Nagtataglay ng dalawang hormon ang pinagsamang iniinom na kontraseptibo (combined oral contraceptive o COC)—estrogen at progestogen. Kumikilos ito sa pamamagitan ng pagpigil sa obulasyon.
• Napakabisa nito at mababa sa 1% ang antas ng pagkabigo kung ininom nang tama.
• Maaaring ito ay isang 21-araw na programa kung saan nagtataglay lahat ng pildoras ng mga hormon at kailangang ihinto ng mga gumagamit sa loob ng 7 araw sa pagtapos ng bawat pakete, o isang 28-araw na programa na kasama ang 21 aktibong pildoras na nagtataglay ng hormon kasunod ang 7 hindi aktibong placebo na pildoras at maaaring magsimula kaagad sa bagong pakete ang mga gumagamit pagkatapos ubusin ang isa. Karaniwang nangyayari ang mga regla sa panahon ng 7 araw ng walang pildoras na pagitan o kapag umiinom kayo ng mga tabletang placebo.
• Dapat kumonsulta ang mga kliyente sa doktor bago simulan ang pag-inom ng mga pildoras.

2. Paraan ng Pagbibigay

• Dapat simulan ng kababaihan ang pag-inom ng mga pildoras sa loob ng unang 5 araw ng mga regla at kailangan ang mga condom para sa dagdag na proteksyon sa loob ng 7 araw.
• Dapat inumin ang mga pildoras sa parehong oras araw-araw.

3. Masasamang Epekto

• Maaaring magkaroon ang ilang babae ng pagduduwal, pagsusuka, pagkahilo, sakit ng ulo, pagkapuno ng dibdib o pagtaas ng timbang, atbp. pagkatapos ng pagsisimula ng mga pildoras na COC. Mawawala ang karamihan sa mga sintomas na ito matapos ang ilang linggo.

4. Mangyaring humingi ng medikal na pagsusuri sa lalong madaling panahon at sabihin sa inyong doktor na gumagamit kayo ng pinagsamang iniinom na kontraseptibong pildoras, kung mayroon kayo ng mga sumusunod na sintomas:

• Masamang atake ng pagkahilo o pagkahimatay, matinding pananakit ng ulo, markadong hindi pantay na sagabal sa paningin (lalo na ang pagkawala ng lawak ng paningin o panlalabo ng paningin), nabubulol na pagsasalita, panghihina o paraesthesia na nakaaapekto sa isang gilid o isang bahagi ng katawan, hindi maipaliwanag na pagkawala ng hininga na mayroon o walang pag-ubo ng dugo, matinding pananakit ng gitnang dibdib o matinding pananakit sa alinmang panig ng dibdib na pinalalala ng paghinga, matinding pananakit ng tiyan o matinding pananakit ng kalamnan ng binti (walang kaugnayan sa trauma ni pagkatapos ng ehersisyo), mataas na presyon ng dugo o paninilaw ng balat.

5. Mangyaring bumalik sa Maternal and Child Health Centre (MCHC) para sa pagsusuri sa kaangkupan na ipagpatuloy ang iyong kontraseptibong pildoras, kung mayroon kayo ng sumusunod na mga kondisyon:

• May anumang palatandaan at sintomas ng pagbubuntis
• Bagong na-diagnose na mga sakit, hal. sakit sa puso, stroke, diabetes mellitus, hypercholesterolemia (pagtaas ng antas ng lipid), pagbabara ng daluyan ng dugo, kanser o iba pang bagong na-diagnose na sakit na medikal at pang-operasyon
• Pagkakaroon ng hindi gumaling-galing na sakit (hal. diabetes mellitus, altapresyon) o umiinom ng pangmatagalang gamot (hal. laban sa epilepsy, laban sa depresyon)
• Plano para sa isang operasyon
• Kasaysayan ng pamilya ng sakit sa puso, stroke, pagbabara ng daluyan ng dugo (thromboembolic disease) o ibang sakit

6. Ang Pildoras at Thrombosis

• May panganib ng pagbabara ng daluyan ng dugo umiinom ka man ng pildoras o hindi. Magkakaroon ng mas mataas na panganib ng pagkakaroon ng namuong dugo sa isang ugat ang mga babaeng umiinom ng kontraseptibong pildoras kumpara sa mga normal na babae, ngunit mas mababa kaysa sa mga buntis.
• Ipinakita ng mga pag-aaral na ang mga babaeng umiinom ng pildoras ay nagkaroon ng pagtaas ng panganib ng pagkakaroon ng mga namuong dugo na maaaring bumara sa isang ugat o arterya. Sa malubhang kaso, maaari itong magdulot ng deep vein thrombosis, pulmonary embolism, stroke at atake sa puso.
• Maaaring hindi angkop na gumamit ng pildoras ang mga babaeng may mas mataas na panganib ng pagkakaroon ng namuong dugo sa isang ugat o sa isang arterya:
  • May mas mataas na panganib ang mga sumusunod na babae sa pagkakaroon ng namuong dugo sa isang ugat: hal. labis sa timbang, mas matanda, hindi gumagalaw, buntis, o may kasaysayan ang pamilya ng pamumuo ng dugo sa ugat.
  • May mas mataas na panganib ang mga sumusunod na babae sa pagkakaroon ng namuong dugo sa isang arterya: hal. sakit sa puso, mataas na presyon ng dugo, hypercholesterolemia (pagtaas ng antas ng lipid), diabetes mellitus, naninigarilyo, labis ang timbang, mas matanda, o may kasaysayan ang pamilya ng pamumuo ng dugo sa arterya.

7. Ang Pildoras at mga Kanser

• Maaaring mabuo ang mga kanser umiinom ka man o hindi ng kontraseptibong pildoras.
• Kanser sa obaryo at endometrium: Iminungkahi ng mga pag-aaral na ang mga babaeng umiinom ng pildoras ay may 40% hanggang 50% ng pagbaba ng panganib ng pagkakaroon ng kanser sa obaryo at kanser sa endometrium.
• Kanser sa suso: Ipinakita ng mga pag-aaral na para sa mga babae na nasa parehong edad, may bahagyang mas mataas hanggang katulad na antas ng kanser sa suso ang mga umiinom ng pildoras kaysa sa hindi umiinom nito. Pagkatapos huminto sa pag-inom ng pildoras, unti-unting bababa ang panganib at ang panganib ng kanser sa suso ay katulad ng sa mga hindi uminom ng pildoras matapos ihinto ang pildoras sa loob ng 10 taon.
• Kanser sa cervix: May tumaas na panganib ng kanser sa cervix sa mga babaeng umiinom ng pildoras. Gayunman, mayroon pa ring walang katiyakan na konklusyon kung ang pagtaas ng panganib ng kanser sa cervix ay direktang may kaugnayan sa pildoras; o aktibo sa pakikipagtalik sa mas batang edad, o dating kasaysayan ng sakit na naipapasa sa pakikipagtalik, o mayroong maraming kapareha sa pakikipagtalik.

8. Tatandaan sa paglaktaw sa pildoras

• Paglaktaw ng 1 pildoras na hormone
  • Mangyaring inumin kaagad ang nalaktawang pildoras kahapon
  • Inumin ang mga natitirang pildoras gaya ng inyong karaniwang iskedyul
• Paglaktaw ng 2 o higit pang pildoras na hormone
  • Mangyaring inumin kaagad ang nalaktawang pildoras kahapon (Itapon ang iba pang nalaktawang pildoras)
  • Inumin ang mga natitirang pildoras gaya ng inyong karaniwang iskedyul
  • Gumamit ng mga condom bilang suportang kontrasepsyon sa susunod na 7 araw para sa proteksyon laban sa pagbubuntis
  • Mangyaring bumalik sa MCHC sa lalong madaling panahon para sa pagpapayo at pagsusuri ng pangangailangan para sa pang-emergency na kontrasepsyon
• Paglaktaw sa alinman sa mga hindi aktibong pildoras
  • Itapon ang nalaktawang hindi aktibong pildoras at ipagpatuloy ang pag-inom ng pildoras

Bago kayo humingi ng medikal na payo, mangyaring irekord nang malinaw ang:

1. Tumpak na (mga) petsa ng paglaktaw ng (mga) pildoras
2. (Mga) petsa na may pakikipagtalik sa panahon ng paglaktaw ng pildoras at 2 linggo bago ito para mapadali ang karagdagang pamamahala

9. Pag-inom ng ibang gamut

• Mangyaring ipaalam sa inyong doktor na umiinom kayo ng kontraseptibong pildoras bago uminom ng iba pang gamot, dahil maaaring makaapekto ang ilang mga gamot sa kontraseptibong epekto ng mga kontraseptibong pildoras.

Kung mayroon kayong anumang tanong, mangyaring humingi ng payo mula sa inyong doktor ng pamilya o bumalik sa inyong MCHC para sa payo.