Isang uri ng taba sa ating dugo ang triglycerides. Mapapataas ang panganib ng sakit sa puso ng mataas na antas ng triglyceride. Maaaring tumaas ang antas ng triglycerides ng dugo dahil sa minanang henetiko, mga sakit sa metabolismo (tulad ng diabetes) at ilang gamot. Tataas din ang ating triglycerides ng dugo kapag kumakain tayo ng napakaraming taba, refined carbohydrates (kabilang ang dagdag na asukal) at alak.

Magpatingin sa inyong doktor para sa pagsusuri kung mataas ang inyong triglycerides.  Makatutulong sa inyong pagkontrol ng mataas na antas ng triglyceride ang ilang simple pero mabisang pagbabago sa inyong pamumuhay at gawi sa pagkain.

Makatutulong sa pagkontrol ng antas ng triglyceride ng dugo ang mga pagbabago sa diyeta at pamumuhay:

1. Kontrolin ang inyong timbang kung sobra kayo sa timbang

   Ipinakita ng pananaliksik na sa pagbabawas ng 5-10% ng timbang ng ating katawan, maaari nating mapababa nang 20% ang antas ng triglyceride ng dugo. Abutin ang body mass index sa pagitan ng 18.5 at 22.9.

2. Magkaroon ng regular na pisikal na aktibidad

   Bukod sa pagsunod sa masustansyang diyeta, dapat kayong magkaroon ng hindi bababa sa 30 minutong katamtamang tindi ng ehersisyo o pisikal na gawain araw-araw. Angkop na pagpipilian ang mabilis na paglakad, pagjo-jogging, pagsayaw, paglangoy, mga larong may bola at pagbibisikleta. Dagdagan ang inyong pisikal na gawain sa pamamagitan ng pag-akyat sa hagdan, paggawa ng mga gawaing bahay, at pagbaba nang mas maaga sa mga hintuan ng bus at maglakad papunta sa inyong destinasyon.

3. Sundin ang isang malusog na plano ng pagkain na mababa sa taba at refined carbohydrates

   • Piliin ang mga buong butil tulad ng brown rice, whole meal na tinapay at oatmeal, atbp. sa halip na refined carbohydrates hal. puting kanin, puting tinapay, handa ng kainin na cereal, atbp.
   • Kumain ng mas maraming prutas at gulay
     Nagtataglay ang katas ng prutas ng maraming natural na asukal dahil karaniwang kailangan natin ng 3-4 na hain ng prutas para makagawa ng 1 tasang katas ng prutas. Subukang kumain ng 2 hain ng prutas araw-araw sa halip na uminom ng katas ng prutas.
   • Kumain ng katamtamang dami ng karne, isda, itlog at mga alternatibo
     • Piliin ang karneng walang taba at iwasan ang mga naprosesong karne. Alisin ang taba at balat mula sa karne at manok bago lutuin at kainin.
     • Mapapababa ng omega-3 fatty acids ang triglycerides ng dugo. Inirerekomenda ng American Heart Association na kumain ng isda (lalo na ang mga isdang mayaman sa omega-3 fatty acids tulad ng salmon, sardinas, makerel at yellow Croaker) 2 beses sa isang linggo, na halos 140g bawat hain.
       Piliin ang tuyong beans, hal. adzuki beans, munggo, pulang patani, soy beans at lentil. Mabuti ring mapagkukunan ng protina at dietary fibre ang mga ito.
   • Uminom ng 1-2 hain ng gatas o mga alternatibo. Piliin ang kaunting taba o inalisan ng taba na mga produktong mula sa gatas
   • Bawasan ang pagkain ng taba (lalo na ang saturated at trans fat):
     • Iwasan ang mga produktong gawa sa niyog, langis ng niyog, langis ng palma, mantikilya at mantika.
     • Gamitin ang mga pamamaraan sa pagluluto na mababa sa taba tulad ng pagpapakulo, paglalaga, pagpapasingaw, paghahain ng malinaw na sabaw, pag-iihaw, paghuhurno o pagbubusa.
     • Iwasan ang sinangkutsang kanin o noodles, hinurnong kanin o paghahalo ng gravy sa kanin.
     • Piliin ang mantikang mataas sa unsaturated fats, hal. mantikang mula sa canola, sunflower, olive, buto ng ubas, mais, mani at soybean. Limitahan ang dami ng mantika sa 6 na kutsarita kada araw (halos 2 kutsarita kada pagkain).
     • Limitahan ang pagkain ng mga meryendang mataas sa trans fat hal. mga pastelerya, tart, biskwit na may palamang cream, cookies, tinapay na mayaman sa taba, cake at sitsirya.
   • Bawasan ang pagkonsumo ng asukal
     Sa pangkalahatan, hindi dapat kumonsumo ng higit sa 7 kutsaritang asukal ang babaeng nangangailangan ng halos 1500 kilocalories kada araw. Kabilang dito ang mga asukal na idinagdag sa mga pagkain, at ang asukal na likas na kasama sa honey, syrup at katas ng prutas.
     • Limitahan ang mga pagkain at inuming mataas sa asukal, hal. panghimagas, lollipop, tsokolate, gulaman, puding, cake, breakfast cereals na may karagdagang asukal, pinatuyong prutas na binalutan ng tinunaw na asukal, de-latang prutas, regular na soft drink, tinimplahang juice drink, yoghurt drink, energy drink, tsokolate/lasang gatas, pinatamis na gatas, atbp.
   • Palaging basahin etiketa ng pagkain kapag bumibili kayo ng mga produktong pagkaing nakapakete
     • Piliin ang mga pagkaing may mababang taba at asukal: Gamitin ang etiketa ng nutrisyon para ihambing ang taglay na sustansya ng mga produktong pagkain at piliin ang mas mababa ang taba at asukal.
     • Iwasan ang mga pagkaing mayroong trans fat: Suriin ang listahan ng mga sangkap at iwasang piliin ang mga produktong gawa sa hydrogenated vegetable oil/taba, partially hydrogenated vegetable oil, shortening, mantikilya o non-dairy creamer na pinagmumulan ng trans fat.

4. Iwasan ang alak

   Nagbibigay ng lakas ang anumang uri ng alak. Nagbibigay ng dagdag na lakas ang sobrang pag-inom ng alak, na magiging taba at magpapabilis sa pagdami ng triglyceride. Kailangan ninyo ng regular na pagsusuri para sa triglyceride at kolesterol para sa pagsusuri ng doktor.

Kung hindi tumutulong ang pagbabago sa diyeta at pamumuhay sa pagpapababa ng antas ng inyong triglyceride, maaaring pag-usapan ninyo ng inyong doktor ang plano ng paggamot.